Robert the Roommate og Skúli Mennski í Gömlu kirkjunni

Robert the Roommate og Skúli Mennski eru að hefja tónleikaferðalag um landið og munu spila í Gömlu Kirkjunni á Djúpavogi sunnudaginn 30. júní kl. 16:00. Miðaverð er kr. 1.500 og rennur ágóðinn til uppbyggingar á húsinu.

Hljómsveitin Robert the Roommate var stofnuð vorið 2010, fyrst með það í huga að spila saman tónlist eftir gömlu og góðu meistarana á borð við Bob Dylan & Leonard Cohen. Um haustið tók sveitin þátt í Lennon ábreiðulagasamkeppni Rásar 2 og bar sigur úr býtum. Nú einbeitir hljómsveitin sér að því að spila eigið efni sem má kannski helst lýsa sem þjóðlagaskotinni popp/rokktónlist.

Fyrsta plata hljómsveitarinnar heitir Robert the Roommate, samnefnd sveitinni. Hún var hljóðrituð í Stúdíó Sýrlandi, Vatnagörðum, í október 2012. Um hljóðritun og hljóðblöndun sá Bjarni Þór Jensson en hljóðjöfnun var í höndum Hafþórs Karlssonar. Sérstakur gestur á plötunni er Elvar Örn Friðriksson. Öll lögin á plötunni eru frumsamin og má helst lýsa tónlistinni sem þjóðlagaskotinni popp og rokktónlist, með áhrifum frá sveitum á borð við Led Zeppelin og Fleet foxes.

Hljómsveitina í þessari ferð skipa:
Rósa Guðrún Sveinsdóttir: söngur,
Daníel Helgason: gítar,
Þórdís Gerður Jónsdóttir: selló
Kristinn Gauti Einarsson: slagverk.

Skúli mennski hefur verið á ferð og flugi frá árinu 2010, gefið út þrjár plötur sem allar hafa hlotið góða dóma tónlistargagnrýnenda og komið fram á hátíðum á borð við Aldrei fór ég suður, Gæruna og Blúshátíð í Reykjavík.

Sjá nánar um tónleikaferðalagið með því að smella hér.

ÓB