Fréttir

Frá því að sveitarstjórn Djúpavogshrepps  fékk fyrst veður af fyrirhuguðum skipulagsbreytingum hjá Vísi hf., tveimur tímum áður en fréttatilkynning var birt í fjölmiðlum, hafa fulltrúar sveitarfélagsins unnið sleitulaust að málinu með það fyrir augum að fá stöðuna skýrða frekar.  

Fyrstu viðbrögð fulltrúa sveitarfélagsins þann 28. mars eftir fund með fulltrúa Vísis hf sem boðaði fyrirhugaðar breytingar var m.a. að setja þingmenn kjördæmisins, viðkomandi ráðuneyti og byggðastofnun inn í málið svo og funda með atvinnumálanefnd Djúpavogshrepps. Í framhaldi var sett tilkynning / viðbrögð sveitarstjórnar á heimasíðu sveitarfélagsins til að halda íbúum upplýstum.  

Málefnið fékk eðlilega strax algjöran forgang hjá sveitarstjórn Djúpavogshrepps og atvinnumálanefnd og hafa allar aðgerðir fulltrúa sveitarfélagsins síðan miðað að því að kalla eftir samráði og fundum með öllum hlutaðeigandi til að fá sem besta yfirsýn á stöðu mála.

Í liðinni viku hafa sveitarstjóri og oddviti átt  fundi  með eigendum Vísis hf í Grindavík, þingmönnum kjördæmisins í Alþingishúsinu, í sjávarútvegsráðuneytinu með Sigurði Inga Jóhannssyni ráðherra og embættismönnum,  fulltrúum Fiskeldis Austfjarða, forstjóra Nýsköpunarmiðstöðvar, auk þingmanna kjördæmisins á stökum fundum og símafundi með Byggðastofnun.

Þrátt fyrir stíf fundarhöld með hlutaðeigandi aðilum þar sem kallað var eftir skýrum svörum þá liggur engu að síður fyrir að það getur tekið einhvern tíma að vinna úr stöðu sem þessari, meðal annars er varðar mál sem snúa beint að stjórnvöldum þegar um svo stórt byggðamál er að ræða. 

Verkefni sveitarfélagsins miðar að því á þessum tímapunkti að halda öllum gluggum opnum og  reyna  allt til þess að fá bestu hugsanlegu niðurstöðu fyrir samfélagið.  Jafnframt er fulltrúum sveitarfélagsins ljóst að það liggur við að fá svör. 

Áður en næstu skref verða tekin af hálfu sveitarstjórnar er beðið eftir viðbrögðum frá ríkisstjórn Íslands en bæði þingmenn kjördæmisins og sjávarútvegsráðherra gáfu fyrirheit á fundi með fulltrúum sveitarfélagsins að málið yrði tekið á dagskrá ríkisstjórnarfundar og væntir sveitarstjórn því viðbragða þaðan sem fyrst.   
Á þessu stigi hafa ekki komið út úr samtölum nánar útfærðar hugmyndir frá Vísi hf. aðrar en þær sem þegar hafa verið gefnar út í fréttatilkynningu, en fulltrúar sveitarstjórnar stefna  að því að funda áfram með eigendum fyrirtækisins á næstunni.  Sjávarklasinn  hefur lýst áhuga sínum á að vinna með sveitarfélaginu í ljósi stöðunnar, hugsanlega með aðkomu Vísis hf en nánari útfærsla um aðkomu og samstarf í þeim efnum hefur ekki verið útfært. Fiskeldi Austfjarða lýsti á fundi sínum með fulltrúum sveitarfélagsins áhuga á að hraða uppbyggingu í fiskeldi í Berufirði í ljósi stöðunnar, þau mál skýrast vonandi frekar á næstu vikum.             

Í gær föstudag að lokinni suðurferð boðuðu sveitarstjóri og oddviti til fundar með sveitarstjórn og atvinnumálanefnd þar sem þeir gáfu skýrslu um stöðu mála.   Á fundinum fór fram uppbyggileg umræða um stöðu mála og horfur og voru fundarmenn allir sem einn sammála um að ganga bjartsýn til áframhaldandi verka með það fyrir augum að það fáist jákvæð niðurstaða úr þessu mikla hagsmunamáli sem við stöndum nú frammi fyrir.
Fulltrúar sveitarfélagsins munu því á öllum sviðum berjast fyrir því að ná sem bestum árangri úr stöðunni með það fyrir augum að koma í veg fyrir bakslag í atvinnulífinu og samfélaginu öllu sem hefur verið í mikilli sókn eins og öllum má kunnugt vera.  Sveitarfélagið Djúpavogshreppur hvetur því starfsmenn Vísis hf á Djúpavogi til að taka ekki ákvarðanir í fljótræði heldur bíða þess frekar að framtíðarhorfur í atvinnumálum skýrist frekar.

Ljóst er að næsta vika verður sömuleiðis lögð öll undir af hálfu fulltrúa sveitarfélagsins til að vinna að framgangi þessa mikla hagmunamáls,  en stefnt er að því að fulltrúar Djúpavogshrepps fundi aftur með þingmönnum kjördæmisins sem kallaðir hafa verið austur til fundar við stjórn SSA næstkomandi miðvikudag. 
Í framhaldi munu sveitarstjóri og oddviti eiga fleiri fundi sem þegar hafa verið skipulagðir meðal annars í RVK seinni part næstu viku.

Það má hverjum ljóst vera að ein af þeim spurningum sem nú eru uppi lítur að fiskveiðistjórnunarkerfinu og þar þurfa stjórnvöld að svara fyrir hvernig þau vilja m.a. túlka markmið lagana sem sett hafa verið um atvinnugreinina.

1 grein laga um stjórn fiskveiða.
„Nytjastofnar á Íslandsmiðum eru sameign íslensku þjóðarinnar. Markmið laga þessara er að stuðla
að verndun og hagkvæmri nýtingu þeirra og tryggja með því trausta atvinnu og byggð í landinu.
Úthlutun veiðiheimilda samkvæmt lögum þessum myndar ekki eignarrétt eða óafturkallanlegt forræði einstakra aðila yfir veiðiheimildum.“ 

Sveitarstjórn og atvinnumálanefnd er sammála um að rétt sé að boða til íbúafundar þegar skýrari svör hafa fengist frá hlutaðeigandi aðilum. Hlutverk Djúpavogshrepps og fulltrúa þess um þessar mundir er fyrst og síðast að reyna að  hafa áhrif á þá aðila sem hafa raunverulega stöðu til að taka ákvarðanir og breyta.  

Það var sameiginlegt mat sveitarstjórnar og atvinnumálanefndar að um leið og öllum er ljóst mikilvægi þess að vanda til verka að þá liggur við að skýra stöðuna eins hratt og kostur er til að eyða óvissu, ekki síst fyrir starfsmenn fyrirtækisins hér á svæðinu. Fulltrúar sveitarfélagsins munu því leggja þunga áherslu á við alla hlutaðeigandi að bregðast við eins hratt og nokkur kostur er.   

Sveitarstjórn og atvinnumálanefnd hvetja íbúa nú sem áður til bjartsýni á framtíð Djúpavogshrepps á öllum sviðum.
Íbúar í Djúpavogshreppi hafa mætt tímabundnu mótlæti í atvinnumálum áður og hafa snúið mótlætinu sér í hag með bjartsýni og kraft að leiðarljósi.

Fiskmarkaður Djúpavogs komst áfram á öðru undankvöldi spurningakeppni Neista 2014.

Í fyrstu umferð hafði Fiskmarkaðurinn betur gegn leikskólanum og í þeirri annarri sigraði lið grunnskólans lið Eyfreyjuness.

Grunnskólinn og Fiskmarkaðurinn mættust síðan í síðustu umferðinni þar sem Fiskmarkaðurinn stóð uppi sem sigurvegari.

Næsta undankvöld fer fram í Löngubúð mánudaginn 7. apríl kl. 20:00.

Myndir má skoða með því að smella hér.

ÓB
Myndir: IBG

Þá er fyrsta bæjarlífssyrpa 2014 loksins komin inn en hún gerir janúar, febrúar og mars skil. Þar má m.a. finna myndir frá Öskudegi og 112 deginum ásamt mörgu öðru.

Myndirnar getið þið skoðað með því að smella hér.

ÓB

Ákveðið hefur verið að fresta Músik Festivali til 1. maí.
Lofum brjáluðu stuði - allir að taka daginn frá.

Nemendur tónskólans

Í kvöld heldur spurningarkeppni Neista áfram.

Þar leiða saman hesta sína Fiskmarkaðurinn og Leikskólinn, í fyrri viðureign kvöldsins, og svo Kennarar og Eyfreyjunes.

Keppnin hefst kl 20 í Löngubúð

Aðgangseyrir 500kr

Stjórn Neista 

SÞÞ

Hjáleiguhlaupið verður haldið Föstudaginn langa, 18. apríl, kl 10:00.

Mæting við Íþróttamiðstöðina og mun Bryndís Reynisdóttir sjá um upphitun.

3 vegalengdir verða í boði: 3km, 6km og 12km

Ölgerðin býður uppá hressingu

Skráning í Íþróttamiðstöðinni eða á olafur@austurbru.is

ÓB

Vísir hf. komst áfram á fyrsta undankvölds spurningakeppni Neista 2014.

Í fyrstu umferð hafði Vísir betur gegn Djúpavogshreppi og í þeirri annarri sigraði lið VMA lið MA.

VMA og Vísir mættust síðan í síðustu umferð þar sem Vísir stóð uppi sem sigurvegari.

Næsta undankvöld fer fram í Löngubúð fimmtudaginn 3. apríl kl. 20:00.

Myndir má skoða með því að smella hér.

ÓB

Hægt er að nálgast fundargerðina með því að smella hér.

ÓB