Tónlistarmenn Hammondhátíðar 2008

 - The Riot -
Landskunnir tónlistarmenn leiða saman hesta sína.

Gítarleikarar eru Halldór Bragason og Björn Thoroddsen með þeim í hljómsveitinni eru þeir Jón Ólafsson píanóleikari, Ásgeir Óskarsson trommuleikari og Jón Rafnsson, bassaleikari.

Björn Thoroddsen er löngu kunnur fyrir djassgítaleik þá oft órafmagnaðan. Í þetta sinn ætlar hann að munda rafgígjuna og er til alls líklegur. Bjössi Thor, einsog vinir hans kalla hann hefur sl. ár verið athvæðamikill við tónlistargjörning í útlöndum og leikur m.a með hljómsveitinni Cold Front sem skipuð er úrvals tónlistarmönnum. Bjössi heldur með FH í blíðu og stríðu enda gamall FH ingur og hefur enn trú á því að hann fái að spila meistaraflokksleik í handbolta með gamla félaginu sínu. Bjössi hefur fengið fjölda viðurkenninga, ekki samt fyrir handbolta, heldur fyrir tónlist og m.a valinn Jasstónlistarmaður ársins 2003.

Þórir Baldursson er án efa hammondgúrú okkar Íslendinga. Auk þess að vera landsfrægur spilari og útsetjari þá hefur hann skapað sér nafn á erlendri grund. Hann hefur leikið með nánast öllum helstu tónsnillingum Íslands allt frá því að hann steig á stokk með Savanna tríóinu á 7. áratug síðustu aldar. Í dag miðlar hann kunnáttu sinni til nemenda FÍH, útsetur og leikur út um allar trissur og skrúfar hammondorgelið sundur og saman í öllum frístundum.
 

Dóri Braga er líklegast þekktasti blúsmaður Íslands í dag. Hann hefur starfrækt hljómsveit sína, Vini Dóra í fjölda ára ásamt því að leika á tónlistarhátíðum út um allan heim. Hann er einnig listrænn stjórnandi Blúshátíðar í Reykjavík. Árið 2006 lék Halldór Bragason í boði Zoru Young á Blúshátíðinni í Chicago sem er stærsta og virtasta blúshátíð heims. Kvikmynd í fullri lengd um ævi Dóra er í undirbúningi og hugmyndavinnslu, hjá lítt þekktu kvikmyndafyrirtæki . Vinnuheitið er " Adventures of a Bluesman" draumurinn er að fá Johnny Depp til að leika Dóra.


Ásgeir Óskarsson er einn virtasti trommari á Íslandi og hefur hann spilað með flestum stærstu hljómsveitum og tónlistarmönnum Íslands, meðal annars Rifsberja, Icecross, Pelican,Eik, Póker, Þursunum, Stuðmönnum Vinum Dóra og KK Hann hefur unnið að um 300 plötum og gefið 3 plötur út sjálfur, "Veröld smá og stór", "Áfram" og "Sól". Ævisaga full af smáatriðum væntanleg !



Jón Rafnsson hefur, allt frá því hann flutti heim frá Svíþjóð árið 1990 verið mjög virkur í íslensku tónlistarlífi og leikið jöfnum höndum; jazz, klassík, með danshljómsveitum, í leikhúsum, auk þess að leika inn á fjölda geisladiska.Hann er ótvíræður íslandsmeistari í tríóum og má þar nefna m.a. tríóin Guitar Islancio, Delizie Italiane, Titanic og Tríó BT, svo fáein séu nefnd og starfar auk þess sem kennari við tónlistarskóla FÍH og tónlistarskóla Hafnarfjarðar. Jón hefur leikið á bassa frá því hann var 15 ára og er án efa í hópi 200 bestu bassaleikara landsins.
 

Tónlistin sem þeir félagar leika verður uppreisn gegn poppi, blús og djasstónlist undir áhrifum frá kosmiskum kröftum og spyrnugleði Þróttara . Snarstefjaður sígaunaseiður að hætti galdramanna af ströndum við ljóð Snorra á Húsfelli og Robert Johnson með takthryni Vodoo galdramanna Missisippi og seiðmannna Afríku.