Tónlistarmenn Hammondhátíðar 2008

- Tregasveit Kristjönu Stefánsdóttur -

Tregasveitina skipa:

Kristjana Stefánsdóttir, söngur
Agnar Már Magnússon, hammond orgel
Ómar Guðjónsson, gítar
Scott McLemore, trommur

Kristjana Stefánsdóttir lauk með láði námi í djasssöng frá Konunglega Listaháskólanum í Haag í Hollandi vorið 2000 undir handleiðslu Rachel Gold, en áður hafði hún lokið söngnámi við Söngskólann í Reykjavík og sótt einkatíma hjá Sigrúnu Hjálmtýsdóttur og Sigríði Ellu Magnúsdóttur. Kristjana hefur einnig lokið á námi í söngtækni hjá Cathrine Sadolin í Complete Vocal Institute í Kaupmannahöfn 2005. Fyrsta geislaplata Kristjönu Ég verð heima um jólin með Kvartett Kristjönu Stefáns kom út 1996, en hún hefur síðan hljóðritað bæði í eigin nafni og sem gestasöngvari og komið reglulega fram í útvarpi, sjónvarpi og á tónleikum. Sólóplatan Kristjana frá árinu 2001 (gefin út í Japan 2005) var tilnefnd til Íslensku tónlistarverðlaunanna 2001 og einnig Fagra veröld 2002 þar sem hún söng lög Sunnu Gunnlaugsdóttur við ljóð ýmissa höfunda. Geislaplatan Ég um þig kom út 2005 og var samstarfsverkefni hennar með píanistanum Agnari Má Magnússyni. Hún var tilnefnd til Íslensku tónlistarverðlaunanna 2005 sem Jassplata ársins. Árið 2006 kom út geislapalatan Hvar er tunglið?, þar sem Kristjana syngur lög Sigurðar Flosasonar við ljóð Aðalsteins Ásbergs Sigurðssonar. Fyrir það var Kristjana tilnefnd til Íslensku tónlistarverðlaunanna sem flytjandi ársins 2006.
Kristjana hefur haldið tónleika víða, m.a. í Hollandi, Þýskalandi, Bandaríkjunum, Englandi, Finnlandi, Danmörku og Japan.
Kristjana býr og starfar í Reykjavík.